Pentaqondan bildirilib ki, ABŞ prezidenti Donald Trampın müraciətinə müvafiq olaraq, bu il ərzində hərbi paradın keçirilməsi planlaşdırılır. Lakin, paytaxt Vaşinqton küçələrinin zədələnməməsi üçün parada tanklar daxil edilməyəcək.
Keçən ay Tramp 11 noyabr Veteranlar Günü münasibətilə paytaxtda hərbi paradın təşkil edilməsi imkanlarının araşdırılması göstərişi vermişdi.
Pentaqonun cümə günü ictimailəşdirilən memorandumunda bildirilir ki, yerli infrastruktura xəsarət yetirməmək üçün parad zamanı tanklar nümayiş etdirilməyəcək və yalnız təkərli nəqliyyat vasitələri iştirak edəcək. Memorandumda əlavə edilir ki, parad böyük sayda təyyarələrin uçuşu ilə tamamlanacaq.
Memorandumda paradın təşkil edilməsi üçün sərf ediləcək büdcə qeyd edilməyib. Ağ Evin büdcə direktoru bu yaxınlarda Konqresə bildirib ki, paradın təşkilati məsrəfləri 10 milyondan 30 milyon dollara qədər dəyişə bilər.
Pentaqondan verilən məlumata görə, Ağ Evdən ABŞ Kapitoluna qədərə davam edəcək paradda “azadlığı dəyəri” vurğulanacaq.
ABŞ-da bu ilki Veteranlaq Günü tədbirləri Birinci Dünya Müharibəsinin bitməsinin 100 illiyinə təsadüf edir.
Prezident Donald Tramp və birinci xanım Melania Tramp keçən ilin iyul ayında Fransa prezidenti Emmanuel Makronun dəvəti ilə Bastiliya Gününə həsr edilmiş paradda iştirak ediblər. Bildirilənə görə, ABŞ prezidenti bu təşəbbüsü həmin paraddan ilhamlanaraq irəli sürüb.
Birləşmiş Ştatlarda hərbi paradlar nadir hallarda keçirilir. Sonuncu parad 1991-ci ildə ABŞ ordusunun Körfəz Müharibəsində Səddam Hüseynin İraq qoşunlar üzərində qələbəsinə həsr edilmişdi.
