Accessibility links

Nümayəndələr Palatası Trampın impiçmentinə dair qətnaməni təsdiq edib


ABŞ-ın Nümayəndələr Palatası oktyabrın 31-də prezident Donald Trampın impiçment prosesini səsə qoyub.

İmpiçment araşdırmasına dair qətnamə 232-196 səslə təsdiq edilib. Səsvermədə respublikaçıların hamısı, demokratlardan isə ikisi qətnamənin əleyhinə səs verib.

Səsvermədən dərhal sonra ABŞ prezidenti Donald Tramp Tvit edərək bunu “ Amerika tarixində ən böyük ifritə ovu” adlandırıb.

Palatanın demokrat spikeri Nensi Pelosi nümayəndələrə ünvanladığı məktubunda proseslə bağlı "bütün şübhələri" aradan qaldırmağa çalışdığını yazıb.

Pelosi deyib ki, impiçment prosesinə dair qətnamə "hazırkı və davam edən araşdırmaları təsdiq edəcək…Amerika xalqına açıq olan dinləmə prosedurlarını təmin edəcək, sübutları məhkəməyə təqdim etməklə yanaşı, prezident və onun vəkilinin məhkəmə hüquqlarını müəyyənləşdirəcək."

Tramp və onun Respublikaçı tərəfdarları impiçmenti Nümayəndələr Palatasının səsvermə keçirmədiyinə görə qeyri-legitim adlandırıb. Pelosi isə bu arqumenti "mənasız" hesab edib.

Qanunlar palatanın prosesin təsdiqi üçün səsvermə keçirməsini tələb etmir və əksəriyyət təşkil edən Demokratlar bu proses üçün qaydalar tətbiq edə bilər.

Tramp administrasyasının keçmiş rəsmiləri həftə boyu Konqresdə bağlı qapılar arxasında ifadə verib. Demokratlar isə Trampın xarici ölkədən 2020-ci ildə keçiriləcək seçkiyə müdaxilə etməsini istədiyini sübut edəcək məlumatlar toplamağa çalışır.

Keçən həftə impiçment araşdırması aparan Nümayəndələr Palatasının Demokratları bir neçə nəfərin ifadələrini dinləyib.

Prezident Ukraynadan rəqibi Co Bayden və onun oğlu barədə məlumat toplamasını istəməkdə ittiham olunur. Bu səbəblə Nümayəndələr Palatasının Kəşfiyyat Komitəsinin sədri Adam Şiff məhkəmə qərarı ilə bununla bağlı əlavə məlumat tələb edib.

Tramp administrasiyası isə hələ ki, sənədləri təqdim etməkdən boyun qaçırır.

Tramp bildirir ki, Nümayəndələr Palatasının Demokratları araşdırmanın rəsmiləşdirilməsi üzərində səsvermə keçirməyənədək əməkdaşlıq etməyəcək.

Şərhlərə bax

XS
SM
MD
LG