Fransa prezidenti Emmanuel Makron bazar ertəsi deyib ki, hökuməti İranın İsrailə pilotsuz təyyarələr və raketlərlə hücumundan sonra İsrail və İran arasında vəziyyətin gərginləşməsinin qarşısını almaq üçün əlindən gələni edəcək.
Fransanın BFM-TV və RMC mediasına danışan Makron həmçinin İsraili İranla eskalasiyadansa onu təcrid etməyə çağırıb.
Almaniya kansleri Olaf Şolz bazar ertəsi eyni mesajla İrana İsrailə qarşı növbəti hücumlar həyata keçirməməklə bağlı xəbərdarlıq edib, İsraili isə vəziyyətin gərginləşməməsində öz rolunu oynamağa çağırıb.
İsrail rəsmiləri təhsil fəaliyyətlərinin bazar ertəsi bərpa ediləcəyini və böyük toplantılara qoyulan məhdudiyyətlərin qaldırılacağını bəyan edib.
İranın dövlət mediası İsrailə hava hücumları səbəbindən ölkənin hava limanlarında dayandırılan fəaliyyətlərin bərpa edildiyini bildirib.
İran hücuma aprelin 1-də İsrailin İranın Dəməşqdəki konsulluğuna ehtimal edilən hücuma cavab olaraq başlayıb. İsrail bir neçə İran hərbi komandirinin ölümünə səbəb olan hücuma görə məsuliyyət daşıdığını nə təsdiq, nə də təkzib edib.
İsrail İrana ərazisindən hər hansı cavab zərbəsi endirməməsi barədə xəbərdarlıq etmişdi. İran isə cavabının şənbə günü axşam hücumu ilə məhdudlaşdığını bildirdi və İsrailin İrana hücum edəcəyi təqdirdə İsrail və ABŞ-a qarşı daha böyük addımlar atacağı barədə xəbərdarlıq etdi.
İranın hücumunu pisləyən diplomatlar, eyni zamanda vəziyyətin daha geniş münaqişəyə çevrilməsinin qarşısını almağa çalışıb.
ABŞ Dövlət katibi Antoni Blinken və müdafiə naziri Lloyd Austin bazar günü Səudiyyə Ərəbistanı, Türkiyə, Misir və İordaniyadakı həmkarları ilə görüşüb.
Aparıcı sənaye ölkələri olan Böyük Yeddilər (G7) bazar günü danışıqlar apardıqdan sonra İranın İsrailə hücumunu “birmənalı şəkildə” pisləyib.
İtaliyanın sədrlik etdiyi G7 liderlərinin bəyanatında “Biz İsrailə və onun xalqına tam həmrəyliyimizi və dəstəyimizi ifadə edir və onun təhlükəsizliyinə sadiqliyimizi bir daha təsdiqləyirik” deyilib.
İsrail bazar günü İranın ölkəyə qarşı “görünməmiş hücum”da 320 döyüş başlığı atdığını, lakin İsrailin hava hücumundan müdafiə sisteminin ABŞ və digər dəstək verən ölkələrin müdafiə vasitələri ilə birlikdə onların 99 faizini vurduğunu bildirib.
İsrail Müdafiə Qüvvələrinin sözçüsü İranın İsrailə qarşı 170 partlayıcı dron, 120 ballistik raket və 30 qanadlı raket atdığını, bunların əksəriyyətinin birbaşa İran ərazisindən gəldiyini, lakin bəzilərinin İraq və Yəməndə İranın dəstəklədiyi qüvvələr tərəfindən atıldığını bildirib.
Forum