ABŞ və İsrail Tehranın 2015-ci il nüvə anlaşmasını xilas etmək üçün danışıqlara qayıtmadığı təqdirdə İranla "B Planı" razılaşmasını nəzərdən keçirdiklərini bildirib.
ABŞ Dövlət katibi Antoni Blinken və İsrailin Xarici işlər naziri Yair Lapid ölkələrinin ABŞ-ın yenidən qoşulacağı təqdirdə İranın anlaşmaya riayət edərək qayıtmaq təklifini rədd edəcəyi halda onlar "başqa variantları" müzakirə etməyə başladıqlarını açıqlayıblar.
Bu variantların nələr ola biləcəyi bildirilməyib, ancaq sanksiyaların artırılmasından gizli və ya hərbi əməliyyata qədər diplomatik olmayan geniş seçim variantları mövcuddur.
Müqaviləni bərpa etmək Bayden administrasiyası üçün prioritet idi və bu məqsəddən imtina onun xarici siyasət qaydalarına zərbə olardı.
Prezident Donald Trampın 2018-ci ildə ABŞ-ı çıxardığı razılaşmada İsrail heç vaxt yer almayıb.
Blinken və Lapid İranın Vyanada ABŞ-la dolayı danışıqlara qayıtmağa hazır olduğunu bildirdiyi vaxtda bunu açıqlayıblar, ancaq konkret bir vaxt təyin etməyiblər.
Blinken İranın razılaşmaya qayıtması üçün fürsət pəncərəsinin bağlanmaqda olduğunu bir daha təkrarlayıb, lakin yenə də ən gec tarixi qeyd etməyib.
"Zaman tükənir. İran kursunu dəyişməsə, başqa variantlara müraciət etməyə hazırıq və müttəfiqlərimiz və tərəfdaşlarımızla bu məsləhətləşmələr bu işin bir hissəsidir" - deyə, Blinken bildirib.
"İranın yaratdığı problemi həll etmək üçün bütün mümkün variantları nəzərdən keçirəcəyik. Və yenə də diplomatiyanın bunun ən təsirli yolu olduğuna inanırıq. Ancaq diplomatik iş üçün iki tərəf lazımdır və İranın buna hazır olduğunu hələ görmürük" - deyə, Dövlət katibi əlavə edib.
Lapid İranın nüvə silahı istehsal etməsinin qarşısını almaq üçün lazım gələrsə, İsrailin hərbi gücdən istifadə edəcəyini bir daha xəbərdar edərək daha açıq danışdı.
"Ölkələrin dünyanı zülmdən qorumaq üçün güc tətbiq etməli olduğu vaxtlar var. İranlılar dünyanın onları dayandırmaqda ciddi olduğuna inanmırlarsa, onlar bomba üçün tələsəcəklər" - deyə, o qeyd edib.
Lapid çərşənbə axşamı ABŞ-ın vitse-prezidenti Kamala Harris və Baydenin milli təhlükəsizlik üzrə müşaviri Ceyk Sallivanla Vaşinqtonda bir araya gələrək, ABŞ-ın nüvə anlaşmasına qayıtması və İrana qarşı sanksiyaların yenidən ləğv edilməsi ilə bağlı İsrailin narahatlığını ifadə etmişdi.
