Noyabrın 30-da Qazax Rayon Məhkəməsində AXCP sədrinin müavini Gözəl Bayramlının işi üzrə hazırlıq iclası keçirilib.
İclas zamanı vəkil Elçin Sadıqov bir sıra vəsatət qaldırıb. Vəsatətlərdən biri G.Bayramlının vəkilləri ilə yanaşı əyləşməsinə icazə verilməsi ilə bağlı olub. Məhkəmə vəsatəti təmin etmək istəsə də konvoy rəisi bunun əleyhinə olub və G.Bayramlı yenə “qəfəs”də qalıb.
Həmçinin müdafiə tərəfi bəraətverici əsaslarla cinayətə xitam verilməsi, qanunsuz yollarla əldə edilmiş sübutların cinayət materiallarından çıxarılması və s. barədə vəsatət qaldırıb.
Vəkil E.Sadıqovun sözlərinə görə, hakim vəsatətlərlə bağlı qərarların elan edilməsi üçün dekabrın 1-dək fasilə elan edib.
G.Bayramlı mayın 25-də Gürcüstandan qayıdarkən saxlanılıb. Ona qarşı Cinayət Məcəlləsinin 206.1-ci maddəsi (qaçaqmalçılıq) ilə cinayət işi qaldırılıb. G.Bayramlı hüquq-müdafiə təşkilatları tərəfindən siyasi məhbus kimi tanınıb.
