2002-2006-cı illərdə Norveçin Azərbaycandakı səfiri olmuş Steinar Gil AzadlıqRadiosunun suallarını cavablandırır. Müsahibəni olduğu kimi təqdim edirik:
- Steinar Gil, hazırda harada işləyirsiniz?
- Təqaüdçüyəm. 2011-ci il yanvarın 31-də diplomatik fəaliyyətimə son qoyaraq, Vilnüsdə Norveç səfirliyi vəzifəsindən təqaüdə çıxdım.
- Bakını necə xatırlayırsınız?
- Xatirələrim xoşdur. Lakin həm də təəssüflənməli olursan ki, mən gedəndən bəri vəziyyət heç də yaxşılaşmayıb.
- Siz gedəndən bəri vəziyyəti sonsuz dairəyə bənzədənlər var. Yəni, hakimiyyəti qane etməyən şəxslər həbs olunur, sonra azad edilir, bir qədər keçir yeni həbslər dalğası gəlir...
- Təəssüf ki, mənzərə əsasən buna bənzəyir. Xüsusilə məyus olursan ki, insan haqları fəallarının sonuncu həbsləri məhz Azərbaycanın Avropa Şurası Nazirlər Komitəsindəki sədrliyi dövründə baş verir.
- Azərbaycanın bu quruma sədrliyini tez-tez xatırladırlar. 6 ay əvvəl Avropada ümid edirdilər ki, bu fakt vəziyyəti yaxşılaşdırar. Lakin bunun əksi baş verdi. Sizcə, bu nə deməkdir - diplomatiya dalana dirənib?
- Çətin sualdır. «Sakit diplomatiya» adlandırılan siyasət nəticə vermir. Ona görə yaxşı olardı ki, Avropa Birliyi, Avropa Şurası və, ümumiyyətlə, beynəlxalq ictimaiyyət Azərbaycan hakimiyyətinə daha təsirli tədbirlər haqda düşünsünlər.
- Lakin bəziləri hesab edir ki, Azərbaycandakı siyasi fəallar məhz beynəlxalq ictimaiyyətlə əməkdaşlığa görə təqiblərə məruz qalırlar. Məsələn, hətta kiməsə beynəlxalq mükafat verəndə, hakimiyyət həmin şəxslərə qarşı daha aqressiv olur...
- Mən bu fikirlə razılaşmıram. Belə mükafatlar Azərbaycan kimi dövlətlərə diqqəti artırır. İnsan haqları uğrunda çalışan şəxslərin, təşkilatların və beynəlxalq ictimaiyyətin belə rejimlərə diqqətinin böyük əhəmiyyəti var.
- Azərbaycanda insan haqları dəyərləri uğrunda hələ də çarpışan adamlara müraciət etmək imkanınız olsaydı, nə deyərdiniz?
- Onların işinə dərin heyranlığımı və hörmətimi bildirərdim. Bu qorxmaz insanların nə dərəcədə ağır mübarizə apardıqlarını bilirəm və hesab edirəm ki, onlara hər cür yardım edilməlidir.
- Bəs Azərbaycan hakimiyyətinə sözünüz nə olardı?
- Azərbaycan hakimiyyətinə isə deyərdim ki, dərhal bütün siyasi məhbusları azad etsin!
