Pakistanda ayrı-ayrılıqda həyata keçirilən iki hücum zamanı azı 34 nəfərin öldüyü, onlarla insanın yaralandığı bildirilib.
Rəsmilərin dediyinə görə, əyinlərində bomba gödəkçəsi olan 3 silahlı şəxs cənub liman şəhəri Kəraçidəki Çin konsulluğuna hücum edib və orada azı 4 nəfər öldürülüb.
Hücumun məsuliyyətini baş qərargahı ölkənin cənub-şərq bölgəsindəki Bəlucistan vilayətində yerləşən separatçı “Baluc Azadlıq Ordusu” qrupu öz üzərinə götürüb və bomba hücumu həyata keçirən 3 intiharçının şəklini nümayiş etdirib.
Pakistan rəsmiləri hücumçuların avtomobilindən partlayışı maddə və silahlar aşkar edildiyini bildirib.
Kəraçi hücumundan bir neçə saat sonra isə ölkənin şimal-qərb bölgəsindəki Orakzay regionunda güclü bomba hücumu olub ki, orada azı 30 nəfərin öldüyü, 40 nəfərdən çoxunun yaralandığı deyilib. Yerli rəsmilər və şahidlərin dediyinə görə, qurbanların sayı daha çox olacaq.
