Accessibility links

İslam partiyasının həbsdə olan sədri Mövsüm Səmədov yenidən Qobustan həbsxanasına köçürülür


Mayın 14-də Qaradağ Rayon Məhkəməsində hakim Rəşad Məmmədov qərar çıxarıb

Azərbaycan İslam Partiyasının həbsdə olan lideri Mövsüm Səmədovun cəza rejimi dəyişdirilib. İlahiyyatçı cəzaçəkmə müəssisəsindən üç illik Qobustana köçürüləcək.

Azadlıq radiosunun məlumatına görə bu barədə mayın 14-də Qaradağ Rayon Məhkəməsində hakim Rəşad Məmmədov qərar çıxarıb. Qərar Mövsüm Səmədovun saxlandığı 13 saylı cəzaçəkmə müəssisəsinin rəisi Rauf Məmmədovun təqdimatı əsasında verilib.

Mövsüm Səmədovun özünün də iştirak etdiyi məhkəmədə cəzaçəkmə müəssisəsini əməliyyat şöbəsinin rəisi Namiq Əliyev təmsil edirdi. O, rəisin təqdimatını müdafiə edib. Təqdimatda yazılıb ki, M. Səmədov islaholunmaz məhkumdur, müəssisədə radikal şiə cərəyanı mövzusunda söhbətlər aparır, başqa məhbusları müəssisənin əməkdaşlarına qarşı çıxmağa sövq edir və s.

Mövsüm Səmədovun vəkili Yalçın İmanov rəis Rauf Məmmədovun özünün məhkəmədə iştirakını istəyib. Bildirib ki, rəisin cavablamalı olduğu suallar var: “Mövsüm Səmədov 13 saylı cəzaçəkmə müəssisəsinə daxil olandan sonra onun haqqında verilmiş doqquz tənbeh tədbirinə dair qərarlarda onun baş örtüyünü çıxarmaması, nəzərdə tutulmayan yerdə namaz qılması, müəssisədə abadlıq işlərində iştirak etməməsi, yataq dəstini yerə atması kimi səbəblər göstərilib. Amma müəssisə rəisinin 20 mart 2017-ci il tarixli qərarında konkret olaraq, Mövsüm Səmədovun dövlət əleyhinə söhbətlər apardığı və müəssisədəki məhkumlar arasında dini təbliğat apardığına görə cəzalandırıldığı qeyd olunur. Bu qərar da digərləri ilə ziddiyyət təşkil edir, onları şübhə altına almağa əsas verir”.

Amma məhkəmə vəsatəti təmin etməyib.

Vəkil həmçinin ilahiyyatçının cəzaçəkmə müəssisəsinin əməkdaşlarına qarşı çıxmağa sövq etdiyi iddia olunan iki məhkumun, onun haqqında xasiyyətnaməni imzalamış müəssisə əməkdaşlarının da dindirilməsi haqda vəsatətlər qaldırıb. Vəsatətlər təmin olunmayıb.

Məhkəmədə M. Səmədov özü də çıxış edib. Heç bir qanun pozuntusuna yol vermədiyini deyən ilahiyyatçı baş verənləri qərəzin nəticəsi adlandırıb:

“Bu qərəzin müəssisə rəhbərliyi, yoxsa daha yuxarı səviyyədə olduğunu bilmirəm. Amma hər bir halda, qərəz ortadadır. Mən heç bir qanun pozuntusuna yol vermədiyim halda, haqqımda ardıcıl olaraq, cəza, tənbeh qərarlarının verilməsi də bunun nəticəsidir”.

Səhhətindəki problemlərdən danışan Mövsüm Səmədov deyib ki, qara ciyərində ağrılar var, immuniteti daha da zəifləyib. İlahiyyatçının sözlərinə görə, hətta yaxınlarının müəssisəyə gətirdiyi dərmanları da ona vermirlər.

Yalçın İmanov deyib ki, Qaradağ Rayon Məhkəməsinin qərarından apellyasiya şikayəti verəcək.

M.Səmədov 2011-ci ildə bir neçə tərəfdarı ilə qanunsuz silah saxlamaq və başqa ittihamlarla saxlanıb.

O, 12 il həbs cəzası alıb. Avropa İnsan Hüquqları Məhkəməsi onun işi üzrə kommunikasiyaya başlayıb.

2014-cü il oktyabrın 9-da Qaradağ Rayon Məhkəməsinin qərarı ilə M.Səmədov 12 saylı cəzaçəkmə müəssisəsindən 2 illik Qobustandakı qapalı həbsxanaya köçürülüb. Şərtlərin sərtləşdirilməsi M.Səmədovun intizamı pozması ilə əsaslandırılıb. O, 2016-cı il noyabrın 28-də 12 saylı cəzaçəkmə müəssisəsinə qaytarılıb.

M.Səmədov Azərbaycan hakimiyyətini korrupsiya və dindarların hüquqlarının pozulmasına görə kəskin tənqid edir. 2016-cı ilin avqustunda o, konstitusiyaya dəyişikliklərə etiraz olaraq Qobustan həbsxanasında aclıq aksiyası keçirib. Məhbus prezidentlik müddətinin, səlahiyyətlərinin artırılması və başqa dəyişikliklərə etiraz edib.

Dünyaya Baxış

Dünyaya Baxış. Ukrayna Rusiyanın 26 pilotsuz təyyarəsini vurduğunu bildirib
please wait

No media source currently available

0:00 0:10:31 0:00

Amerika İcmalı

Amerika İcmalı. Ukraynaya dəstək və yardım. NATO baş katibinin Cənubi Qafqaza səfəri.
please wait

No media source currently available

0:00 0:29:43 0:00
XS
SM
MD
LG