Accessibility links

Angela Merkel avqustun 25-də Azərbaycana gələcək


Almaniya kansleri Angela Merkel Azərbaycan prezidenti İlham Əliyev

A.Merkelin Cənubi Qafqaz ölkələrinə səfəri avqustun 23-də başlayıb

Almaniya kansleri Angela Merkelin avqustun 25-də Bakıda Azərbaycan prezidenti İlham Əliyevlə danışıqlar aparacaq.

Turan agentliyinin məlumatına görə, iki ölkə liderinin danışıqları və birgə mətbuat konfransı olacaq.

Daha sonra xanım Merkel 1990-cı ilin yanvarında Sovet qoşunlarının Azərbaycandan çıxarılması zamanı həlak olanların və Qarabağ müharibəsində həlak olanların dəfn olunduğu Şəhidlər Xiyabanını ziyarət edəcək.

Merkel həmçinin işgüzar dairələrin nümayəndələrinin iştirakı ilə keçiriləcək iqtisadi məsələlərə dair dəyirmi masada iştirak edəcək, tədbir başa çatdıqdan sonra Berlinə yola düşəcək.

Agentlik bildirir ki, Angela Merkel Bakıda ikitərəfli iqtisadi əlaqələrin inkişafı və Azərbaycan və Aİ arasında əlaqələrin inkişafı məsələlərini müzakirə etmək niyyətindədir.

İnsan hüquqları mövzusuna gəlincə, Merkel ənənəvi olaraq xarici tərəfdaşları ilə danışıqlarda insan hüquqları, demokratiya və qanunun aliliyi məsələlərinə toxunur, deyə Almaniya hökumətindəki mənbə Turan agentliyinə bildirib və avqustun 12-də müxalifətçi İlqar Məmmədovun azad edilməsini "müsbət əlamət" adlandırıb.

Bundan başqa, Merkelin Bakıya səfəri zamanı Avropaya enerji resurslarının nəqli mənbələrinin şaxələndirilməsi kontekstində Cənub Qaz Dəhlizinin həyata keçirilməsi məsələləri diqqət mərkəzində olacaq.

Merkel həmçinin Qarabağ nizamlanması məsələsinə də toxunacaq. "Almaniya Aİ-dən olan tərəfdaşları ilə birlikdə ATƏT-in Minsk Qrupu çərçivəsində danışıqlar aparılmasını və Aİ-nin Cənubi Qafqazda xüsusi nümayəndəsinin bu danışıqda iştirakını dəstəkləyir.

Berlin Azərbaycanı və Ermənistanı bu münaqişənin dinc, razılaşdırılmış həlli yolunu tapmağa çağırır", deyə mənbə qeyd edib.

Xatırladaq ki, Angela Merkel avqustun 23-dən 25-dək Cənubi Qafqaz ölkələrinə səfər edib.

XS
SM
MD
LG