“Biz, İstanbulun Beşiktaş rayonunda törədilən və çoxlu sayda insanın ölümünə və yaralanmasına səbəb olan qanlı terror aktını qəti şəkildə pisləyirik”. Bu barədə Azərbaycan Xarici İşlər Nazirliyinin açıqlamasında deyilir.
Nazirlik həyatını itirmiş şəxslərin ailələrinə və qardaş Türkiyə xalqına dərin hüznlə başsağlığı verir, kədərini bölüşür və yaralananların tezliklə şəfa tapmasını diləyir.
“Qardaş Türkiyə ilə həmrəyliyimizi bir daha vurğulayırıq. Terrorizmdən əziyyət çəkən dövlət kimi, Azərbaycan terrorizmin bütün forma və təzahürlərini qəti şəkildə pisləyir və terrorizmə qarşı mübarizədə beynəlxalq birliyin səylərini dəstəkləyir”, açıqlamada qeyd edilir.
Azərbaycan prezidenti İlham Əliyev də İstanbulda baş verən terror aktı ilə bağlı baş sağlığı verib
“Biz bu terror aktını lənətləyir, terrorizmin bütün təzahürlərinə qarşı hamılıqla və qətiyyətlə mübarizə aparılmasını vacib hesab edirik”, prezidentin baş sağlığında deyilir.
