Türkiyə və Rusiya Cənubi Qafqaz münaqişələrini müzakirə edib

Türkiyə və Rusiyanın xarici işlər nazirləri Əhməd Davudoğlu və Sergey Lavrov İstanbulda Cənubi Qafqazdakı münaqişələrin, o cümlədən Dağlıq Qarabağ probleminin həlli yollarını müzakirə edib.
Görüşdən sonra keçirilən mətbuat konfransında nazirlər bildirib ki, Cənubi Qafqaz regionunda sülhün və sabitliyin bərqərar olması hər iki ölkənin maraqlarına uyğundur.
Əhməd Davudoğlu deyib ki, rusiyalı həmkarı ilə Cənubi Qafqazda dayanıqlı sülhün, sabitliyin təmin olunması və “dondurulmuş” münaqişələrin həlli istiqamətində iki ölkənin fəaliyyət istiqamətləri müzakirə olunub.
Tərəflər Türkiyə-Rusiya Yüksək Səviyyəli Strateji Əməkdaşlıq Şurasının mart ayında Moskvada keçiriləcək ikinci iclasına dair geniş fikir mübadiləsi də aparıb.