Somali paytaxtı Moqadişuda intiharçı partlayıcılarla dolu maşını Türkiyə səfirliyinin işçilərinin yaşadığı binaya çırpıb. Bomba hücumu nəticəsində üç nəfər ölüb.
Bu ayın əvvəli Ramazan dövrü hücumları intensivləşdirəcəyini elan edib Əl-Şəbəb Tvitter hesabında Moqadişuda hücumun məsuliyyətini öz üzərinə götürüb.
Hadisə nəticəsində üç nəfərin öldüyü, doqquz adamın yaralandığı bildilir. Türkiyə hökuməti hadisə ilə əlaqədar bəyanatla çıxış edərək, hücumu pisləyib.
Türkiyə 2011-ci ildən etibarən Somalidə bərpa səylərinin önündə gedərək, ölkəyə 400 milyondan çox maliyyə yardımı edib.
Bu, islamçı Əl-Şəbəb yaraqlılarının silsilə hücumlarının sonuncusudur.
Əl-Şəbəb iki il bundan əvvəl Somali və Afrika Birliyi qüvvələri tərəfindən bölgədən çıxarılıb. Lakin qrupun son iki ay ərzində Moqadişuda beynəlxalq nümayəndəliklərə qarşı hücumlarında onlarla insan həlak olub.