ABŞ Dövlət katibi Antoni Blinken Rusiya-Ukrayna böhranının optimal həllinin diplomatik yol olduğunu və yaxın günlərdə Fransa, Almaniya və Britaniyadan olan həmkarları ilə məsləhətləşmələr aparacağını gözlədiyini bildirib.
“Bildiyiniz kimi biz ikitərəfli strategiyaya sadiq olmuşuq: bir tərəfdən diplomatiyaya - bu günə qədər üstünlük verilən kursa, məsuliyyətli kursa, digər tərəfdən isə Rusiyanı aqressiv addımlar atmaq fikrindən daşındırmaq üçün təzyiq etmək kursuna” - deyə, Blinken “Dördlük ölkələri” adlanan dövlətlərin görüşü üçün onunla birlikdə Avstraliyaya gedən jurnalistlərə bildirib.
Fransa prezidenti Emmanuel Makron çərşənbə axşamı bildirib ki, qətnamənin qəbulu aylar çəkə bilər.
“Siz yaşadığımız vəziyyəti əhatə edən gərginliyi, onun görünməmiş xarakterini qiymətləndirməyə bilməzsiniz. Bu böhranın bir neçə saatlıq müzakirələr sayəsində həll olunacağına inanmıram” - deyə Makron Kyivdə Ukrayna prezidenti Vladimir Zelenski ilə görüşərkən deyib.
Makron bazar ertəsi Moskvada Rusiya prezidenti Vladimir Putinlə beş saat müzakirələr aparıb.
Fransa lideri deyib ki, onun Putinlə apardığı müzakirələr Rusiya ilə Ukrayna və Kyiv hökumətini dəstəkləyən Qərb ittifaqı arasında qarşıdurmanın “pisləşməyəcəyinə və daha da gərginləşməyəcəyinə” kömək edib.
“Mən öz növbəmdə bizim irəliləməyə imkan verəcək konkret, praktiki həllərin olduğuna inanıram” - deyə, Makron Zelenski ilə görüşdən sonra bildirib.
“Rusiya bu hədələyici mövqeyi qəbul etməklə beynəlxalq ictimaiyyətə təzyiq göstərmək qərarına gəlib” - deyə, Makron böhranın bitmədiyini etiraf edib.
Kremlin sözçüsü Dmitri Peskov çərşənbə axşamı deyib ki, Makronun Putinə etdiyi təkliflərdə “ağıl toxumları” var.
“Hələlik biz qərbli həmkarlarımızın narahatlıqlarımızı nəzərə almağa hazır olduğunu görmürük və hiss etmirik” – deyə, Peskov böhranın həll edildiyi ilə bağlı təklifləri rədd edib.
"Mövcud vəziyyətdə Moskva və Paris razılığa gələ bilmədilər. Fransa Aİ və NATO üzvüdür. Fransa NATO-ya rəhbərlik etmir” - deyə, o əlavə edib.
