Accessibility links

Özbəkistan hərbi xidmətdən qaçan rusları deportasiya etməyəcəyini deyib


Daşkənd hökumətinin cümə günü bildirdiyinə görə, Özbəkistan Moskvanın Ukraynadakı hərbi kampaniyası fonunda hərbi xidmətdən yayınmaq üçün kütləvi şəkildə Mərkəzi Asiyaya qaçan rusları deportasiya etmək niyyətində deyil.

Prezident Vladimir Putin keçən həftə qismən səfərbərlik əmri verdikdən sonra yüz minlərlə kişi, bəziləri isə ailələri ilə birlikdə Rusiyanı tərk edib. Onlardan çoxu Özbəkistana, Qazaxıstana və Mərkəzi Asiyanın digər keçmiş sovet respublikalarına üz tutub.

Hərbi xidmətdən yayınanların bəziləri isə bu ölkələrdə öz təhlükəsizliklərindən narahatdır, çünki həmin hökumətlərin Moskva ilə sıx əlaqələri var.

Özbəkistan Xarici İşlər Nazirliyi bəyanatında digər dövlətlərin suverenliyinə və ərazi bütövlüyünə hörmət kimi prinsiplərə sadiq qaldığını və Ukrayna münaqişəsinin sülh yolu ilə həllini dəstəklədiyini bildirib.

“Qanunları pozmayan əcnəbi vətəndaşlar məcburi deportasiyaya məruz qalmır” deyə, məlumatda bildirilib.

Özbəkistan səfərbərlik elan edildikdən sonra ölkəyə nə qədər rusiyalının gəldiyini açıqlamayıb. Qonşu Qazaxıstan isə Rusiyadan ölkəyə 100 minə yaxın gələnin olduğunu bildirib.

Özbəkistan rəsmiləri bu həftə Rusiya balerinasına Daşkənddə Rusiyanın müharibə səylərinə dəstək kimi qiymətləndirilə bilən rəqs ifa etdiyinə görə töhmət verib.

XS
SM
MD
LG