Accessibility links

Qazaxıstan neftinin ilk partiyası Bakı-Tbilisi-Ceyhan kəməri vasitəsi ilə yola salınıb


Qazaxıstan neftinin ilk partiyası Bakı-Tbilisi-Ceyhan kəməri vasitəsi ilə yola salınıb (Mənbə: SOCAR)
Qazaxıstan neftinin ilk partiyası Bakı-Tbilisi-Ceyhan kəməri vasitəsi ilə yola salınıb (Mənbə: SOCAR)

Aprelin 22-də Bakı-Tbilisi-Ceyhan (BTC) boru kəməri ilə nəql edilən Qazaxıstan neftinin ilk partiyası Türkiyənin Ceyhan limanından yola salınıb.

Bu barədə Azərbaycan Dövlət Neft Şierkətinin (SOCAR) törəmə müəssisəsi olan “SOCAR Midstream Operations” MMC məlumat yayıb.

Məlumatda deyilir ki, “Tengiz” yatağından hasil edilən 83,2 min ton (665 min barel) neft “Alatau” tankerinə yüklənib. Yükləmə mərasimində SOCAR, KazMunayQaz, Tengizşevroil, Kazmortransflot və onların törəmə şirkətlərinin nümayəndə heyətləri iştirak ediblər.

“Bu nailiyyət 2023-cü ilin martında başlayan Qazaxıstanın Aktau limanından Azərtrans Səngəçal terminalına davamlı neft tədarükü və sonradan BTC vasitəsilə nəqli nəticəsində əldə edilib. Ceyhan limanında Qazaxıstan neftinin növbəti partiyasının tankerə yüklənməsi 2023-cü ilin may ayının sonuna planlaşdırılır”, məlumatda qeyd edilir.

“SOCAR Midstream Operations” MMC bildirir ki, Qazaxıstan neftinin BTC ilə nəqli SOCAR və “KazMunayQaz” şirkəti arasında hər il 1,5 milyon ton neftin tranzitini nəzərdə tutan saziş çərçivəsində həyata keçirilir. “Tengiz” yatağından hasil edilən Qazaxıstan neftinin ilk partiyası “Prezident Heydər Əliyev” tankeri ilə 23 mart 2023-cü ildə Aktaudan Səngəçal terminalına gətirilib.

SOCAR Qazaxıstan neftini BTC boru kəmərinə qəbul etmək üçün 2022-ci ildə Səngəçal terminalının ərazisi və ətrafında toplayıcı boru kəmərləri şəbəkəsinin yenilənməsi istiqamətində layihələr həyata keçirib. Bu layihələr BTC-nin ötürmə gücündən istifadə səviyyəsini artırıb.

“Qazaxıstan neftinin birinci partiyasının Ceyhan limanından yola salınması SOCAR və KazMunayQaz arasında tərəfdaşlığın möhkəmləndirilməsi istiqamətində önəmli nailiyyətdir. Bu hadisə Xəzər neftinin dünya bazarlarına nəqli üçün əsas marşrut kimi BTC boru kəmərinin strateji rolunu göstərərək regional enerji əməkdaşlığının əhəmiyyətini bir daha sübut edir”, məlumatda qeyd edilir.

BTC vasitəsilə Azərbaycandan Azəri-Çıraq-Günəşli nefti və Şahdəniz kondensatı, eləcə də digər mənbələrdən xam neft və kondensat həcmləri nəql olunur. BTC-nin hazırkı ötürmə gücü gündə 1,2 milyon barel və ya ildə 50 milyon ton təşkil edir. 1768 kilometr uzunluğunda olan BTC boru kəməri 2006-cı ilin iyun ayında istismara veriləndən 2022-ci ilin sonunadək bu boru kəməri vasitəsilə ümumilikdə təqribən 531 milyon tondan çox (3,99 milyard barel) xam neft nəql edilib və Türkiyənin Ceyhan limanında 5244 tankerə yüklənərək dünya bazarlarına göndərilib.

2023-cü il yanvarın 18-də BTC boru kəməri ilə 4 milyard barel neft ixrac edildiyi bildirilib.

Dünyaya Baxış

Dünyaya Baxış.Qubad Ibadoğlu ev dustaqlığına buraxılıb
please wait

No media source currently available

0:00 0:11:22 0:00
XS
SM
MD
LG