Müsavat başqanının həbsdə olan müavininin qızı vəfat edib [Video-Müsahibə] (arxiv)

Müsavat Partiyası başqanının müavini, həbsdə olan Tofiq Yaqublunun qızı Nərgiz Yaqublu dünyasını dəyişib. Ölüm onu Rusiyanın Tomsk şəhərindəki xəstəxanada yaxalayıb. Xəbəri musavat.com saytı yayıb.

Ana olmağa hazırlaşan Nərgiz əvvəldən onda olan xəstəlikdən vəfat edib.

Nərgiz Yaqublu Azərbaycan demokratik gəncliyinin görkəmli nümayəndələrindəndir, bir çox etiraz aksiyalarının fəal iştirakçısıdır, jurnalistika ilə məşğul olub. Ötən il o, ailə həyatı qurub və yoldaşı ilə birlikdə Rusiyaya köçüb.

Tofiq Yaqublu 2013-cü ilin yanvarında İsmayıllı şəhərində baş verən iğtişaşların təşkili ilə bağlı ittihamla 5 il azadlıqdan məhrum edilib. O ittihamları qəbul etmir, siyasi sifariş hesab edir.

Yaqublu Amnesty İnternational tərəfindən “vicdan məhbusu” elan edilib. Yerli hüquq müdafiə təşkilatları onu siyasi məhbus kimi tanıyıb.

***

Nərgiz Yaqublunun 2013-cü ilin fevralın 6-da atasının həbsi ilə bağlı Amerikanın Səsinə verdiyi müsahibəni təqdim edirik.